洗了腦的家長, 會洗下一代的腦!

只想廣傳, 如果你再沉默, 香港人唔醒,
下一代只會被洗腦得更恐怖!
(轉)一位7.1當值嘅差人心聲
******************************
返咗近15個鐘遊行更，近乎虛脫，幾個鐘後又要出去。好攰，但仲未瞓得著。
遊行人士嘅粗口言猶在耳，當差8年喇，仲未睇化！
多開行車線？我想過你哋，最好唔限你哋行，又唔駛我哋理，我哋去做返日常嘢。
身上十幾磅裝備，俾大雨淋濕，企到乾哂，再淋濕，呢種滋味一d都唔好受。實有人講，死差佬，我有交稅俾你出糧㗎！我知！所以企到對腳勁酸痛我哋都無走開過。但咁辛苦又為咗d乜？我哋收嘅order係維持公衆秩序，簡單d就係唔好俾個遊行亂，唔好有人受傷。但呢份努力嘅血汗，又有幾多人視而不見，甚至刻意扭曲？
當差咁多年，我可以向天發誓，我從來無收到任何一個有政治取向嘅order，警隊高層好驚死，邊敢咁做...。但依家媒體嘅創作力量同幻想真係會嚇你一跳，大膽假設不需求證，但往往信徒極多。
今日，令我瞓唔著嘅，唔係粗口，係一個帶住細路女遊行嘅女人，佢哋等出發嘅時候企正我前面，個女人不停同個細路女講做差佬係警犬，係公安，又教個細路女對住我哋舉中指。個細路女一面天真咁跟住做，個女人就笑得勁開心。我心裏面好嬲，但更心痛，呢d先至係真正嘅洗腦。
某d團體好醒，好知道法律嘅底線，造就咗我哋偏幫佢哋嘅假象，但又有幾多人可以分析到？唔大大炒作已經好感激啦！而往往辱罵我哋、不顧法律後果亂嚟嗰班，只可以講精人出口，你哋目標幾遠大都好，我哋只會見識到你哋帶嚟嘅恥辱同破壞。警民關係惡化，係惡性循環。
政治嘢，我哋真係唔想理，我份糧只包執法，唔包政治打壓，所以唔好諗得咁複雜。從來，我哋都只想儘己之責，多得各大媒體將我哋妖物化(傳媒操守嘅政治中立去咗邊？)，令市民遊行一見到我哋就情緒高脹。
終於想瞓，可以瞓到兩個鐘，大家又見喇！